Həzrət Məhəmmədin (s) peyğəmbərliyə seçilməzdən öncə dini nə idi?
Sual: Həzrət Məhəmmədin (s) peyğəmbərliyə seçilməzdən öncə dini nə idi?
Cavab: Həzrət Məhəmmədin (s) İslamdan öncə hansı dində olması ilə bağlı müxtəlif fikirlər mövcuddur. Yəhudilik, Xristianlıq və İbrahim peyğəmbərin (ə) Hənif dini ehtimallar arasındadır. Bu məsələdə hamı tərəfindən yekdilliklə qəbul edilən nəzər odur ki, o həzrət (s) risalətindən öncə təkallahlı (müvəhhid və monoteist) olmuş və heç vaxt bütlərə sitayiş etməmişdir. Bu barədə bir neçə dəlilə istinad edə bilərik:
1. İmam Əli (ə) həzrət Məhəmmədin (s) həyatından xəbərdar olan insanlarla söhbətində o həzrətin (s) şirk və günahdan uzaq olmasını vurğulayır[1], onun (s), həmçinin, pak ailəsinin (Əhli-beytinin (ə)) tövhid inancında olmasını xatırladırdı.[2]
2. Tarixi faktlar və hədislərə əsasən, Həzrət Məhəmmədin (s) ata-babaları həmişə İbrahim peyğəmbərin (s) Hənif dinində olmuş və təkallahlığa inanmışlar.
3. Allahın Rəsulu (s) uşaqlıq illərində Şama səfər etmiş və orada Buhəyra adında bir rahiblə görüşmüşdür.
Rahib Buhəyra görüş zamanı yeniyetmə Məhəmmədin (s) simasında peyğəmbərlik əlamətlərini gördükdə, onu sınamaq məqsədilə o həzrəti (s) "Lat" və "Üzza" adında iki bütə and vermişdir. Həzrət Məhəmməd (s) isə cavabında belə buyurmuşdur: "Məni bu iki bütə and vermə, Allaha and olsun ki, mənim üçün o ikisindən daha nifrətə layiq bir şey yoxdur." [3]
4. Tarixi mənbələrdə Peyğəmbərin (s) risalətindən əvvəl namaz, oruc və həcc kimi ibadətləri yerinə yetirməsindən bəhs edilir. Məsələn, Hira mağarasında ibadət etmək Peyğəmbərin (s) köhnə adətlərindən sayılırdı. Bundan başqa, Allah Rəsulunun (s) həcci müşriklərin şirkli şüarlara bulaşmış ayinləri ilə uyğun gəlmirdi və onun (s) həccinin İbrahim peyğəmbərin (ə) həccinə uyğunluğu özünü Ərəfatda ayaq üstə durmaq kimi ayinlərdə büruzə verirdi.[4]
Dipnotlar: