Qurani-Kərimın əbədiliyi

Sual:

Qurani-Kərim yalnız nazil olduğu dövrə aiddir ya bütün dövrlər və zamanlar üçün göndərilmişdir?

Cavab:

Qurani-Kərim bəşəriyyət üçün əbədi olan və bütün dövrlər üçün nazil olan hidayət kitabıdır. Quranın bütün insanlara və bütün möminlərə ümumi xitabları Quranın əbədiliyinin əlamətləridir. Quranda bəhs edilən və nazil olduğu zaman dinləyicilər tərəfindən başa düşülməyən elmi möcüzələr, və həmçinin Quranın insanların səadət və nicatındakı məqsədi Quranın əbədiliyinin başqa əlamətləridir. Bundan əlavə, Quran özünü “aləmlərə öyüd-nəsihət” və “bütün insanlar üçün xəbərdarlıq” kimi təqdim edir. Bu məsələ hədislərdə də öz təsdiqini tapmışdır.

Quranın ümumi müraciətləri

Quranın bir çox ayələrində, bütün insanlara və ya möminlərə xitab edilir:

1. İnsanlara müraciət: (﴿يا أَيُّهَا النَّاسُ Ey insanlar! və (يَا بَنِي آدَمَ ) Ey Adəm övladı!

2. Möminlərə müraciət: (يَا أَيُّهَا الَّذِينَ آمَنُوا) Ey iman gətirənlər!

Bundan əlavə, Quran özünü "aləmlərə öyüd-nəsihət" və " insanlara xəbərdarlıq edən" kimi təqdim etmişdir ki, bu da onun əbədiliyinin göstəricisidir.

Quran hekayələri

Quranda, peyğəmbərlərin (s) və keçmiş ümmətlərin həyatı haqda bir çox hekayələr mövcuddur və bu nişanələrə məhəl qoyulmasa da belə, onun batini mənasına diqqət yetirməklə və Quranın mətnindəki geniş və ümumi anlayışlardan onun əbədiliyi əldə edilir.

İmam Baqir (ə) buyurur: “Əgər bir ayə, bir qövm haqqında nazil olsaydı, o qövm öldüyü zaman həmin ayə də ölərdi və Qurandan bir şey qalmazdı. Amma Quran göylər və yer mövcud olduğu müddətcə əbədi olaraq qalacaqdır.” Bu hədis, onu bildirir ki, Quranın əbədiliyi sübuta yetdikdə, onun hekayələri də əbədidir və müəyyən bir qövm və dəstəyə aid deyil, çünki  belə olmasaydı, bir qrupun yox olması ilə onlara xas olan o ayə də məhv olardı.

Quranın elmi möcüzələri

Quran müxtəlif elmi sahələrdə, o dövrün insanlarına məlum olmayan mövzular haqqında məlumat vermişdir və elm inkişaf etdikcə ayənin mənası daha da aydın olmuşdur. Məsələn, Quranda yüksəklik artdıqca nəfəs almanın çətinləşməsi həqiqətini elm bu gün kəşf etmişdir.

Hədislər

İmam Sadiqin (ə) belə buyurduğu nəql olunur: “Quranın təravətli olması buna görədir ki, Allah-taala onu müvəqqəti dövr və ya xüsusi bir dəstə insan üçün göndərməmişdir. O, əbədi və ümumi olduğu üçün hər zaman yenidir və Qiyamət gününə qədər hər bir cəmiyyət üçün cazibədar və təzədir.”

İmam Baqir (ə) buyurur: “Quran günəş və ay kimi daim hərəkətdədir və Qiyamət gününə qədər də insanların həyatını işıqlandıracaq.”