İmam Mehdinin (ə.f) zühur vaxtı

Sual: İmam Zamanın (ə.f) zühur edəcəyi vaxt məlumdurmu?

Cavab: İmam Zamanın (ə.f) zühurunun dəqiq vaxtı yalnız Allaha məlumdur. İmamlardan (ə) nəql olunan hədislərdə, zühurun vaxtını təyin edənlər “yalançı” adlandırılmışdır. Buna baxmayaraq, zühur haqqında bir sıra əlamətlər bildirilmişdir. İmamın zühur edəcəyi yer Məkkə şəhəri və Allah evinin kənarı olaraq bildirilir.

Zühurun vaxtı ilahi sirlərdəndir

İmam Zamanın (ə.f) dördüncü naibi Əli ibn Məhəmməd Səmərinin vəfatından sonra “Qeybəti-kübra”, yəni  böyük qeyb dövrü başlamış və indiyə qədər də davam edir. Bu müddət sona çatdıqdan sonra, Allahın əmri ilə İmam (ə.f) zühur edəcək. Məsum imamlar (ə) bir çox rəvayətlərdə bildirmişlər ki, zühur üçün dəqiq bir vaxt təyin etmək mümkün deyil və bundan yalnız Allah xəbərdardır. Bu hadisə, gözlənilmədən və Allahın əmri ilə baş verəcəkdir və hər kim bunun üçün vaxt təyin etsə, yalançıdır.

Əbu Bəsir deyir:

“سَأَلْتُهُ عَنِ اَلْقَائِمِ عَلَيْهِ السَّلاَمُ فَقَالَ كَذَبَ اَلْوَقَّاتُونَ إِنَّا أَهْلُ بَيْتٍ لاَ نُوَقِّتُ ثُمَّ قَالَ أَبَى اَللَّهُ إِلاَّ أَنْ يُخْلِفَ وَقْتَ اَلْمُوَقِّتِينَ”

İmam Sadiqdən (ə) “Qaim” (imam Mehdi) (ə.f) haqqında soruşdum, buyurdu: “Vaxt təyin edənlər yalan danışırlar, biz Əhli-beyt (ə) onun üçün vaxt təyin etmirik, sonra buyurdu: “Allah vaxt təyin edənlərin təyin etdiyi vaxtı dəyişməkdən başqa, bir şey istəmir.”

“İshaq ibn Yəqub” Məhəmməd ibn Osman Əmri vasitəsilə imam Zamana (ə.f) məktub göndərdi və bir neçə sual soruşmuşdu, imam ona verdiyi cavabın bir hissəsində zühurun vaxtı ilə bağlı buyurdu:

“وَ اَمَّا ظُهُورُ الْفَرَجِ فَاِنَّهُ اِلَی اللَّهِ تَعَالَی ذِکْرُهُ وَ کَذَبَ الْوَقَّاتُونَ”

“Zühurun vaxtına gəldikdə isə, bu, uca Allahın əmrindən asılıdır və vaxtı təyin edənlər yalançıdırlar.”

Zühurun əlamətləri

Vaxtın təyin edilməsində məqsəd, zühurun dəqiq vaxtını müəyyən etməkdir və bu növ vaxtın təyin edilməsinin məsum imamlar (ə) tərəfindən icazəli olmadığı bildirilmiş və onun ilahi sirlərdən olduğu vurğulanmışdır. Amma bəzi əlamətlər qeyd etmişlər ki, onlar meydana gəldikdə, zühurun yaxın olması barədə xəbərdarlıqdır.

Hədislərdə zühur üçün müəyyən və qeyri-müəyyən əlamətlərin qeyd edilməsilə yanaşı, zühurun vaxtı və onun ümumi və qeyri-müəyyən formada (məsələn: günü və ili kimi) vaxtı da qeyd edilmişdir ki, bu da heç bir halda hədislərdə zühurun dəqiq vaxtını təyin etməyin qadağan edilməsi mənasına gəlmir. Həzrət Mehdinin (ə.f) zühurunun vaxtı haqqında ümumi və qeyri-müəyyən şəkildə müxtəlif rəvayətlər vardır. Onlardan bəzilərində “Novruz”, qiyam edəcəyi gün kimi qeyd olunmuşdur. Bəzi hədislərdə, Aşura və şənbə günü həzrətin zühur edəcəyi gün olaraq qeyd edilmişdir. Bir çoxlarında həzrətin qiyam və zühur edəcəyi gün, cümə günü qeyd olunur.

NNovruzun Aşura ilə üst-üstə düşməsində heç bir çaşqınlıq yoxdur, çünki Novruz şəmsi ili ilə, Aşura isə qəməri tarixinə görə hesablanır və bu iki günün müəyyən bir günə təsadüf etməsi mümkündür. Həmçinin, bu iki günün – Aşura və Novruz – cümə və şənbə günlərinə təsadüf etməsi və yaxud Aşura və Novruzun hər ikisinin cümə və ya şənbə gününə təsadüf etməsi də mümkündür. Burada ziddiyyətli görünən məsələ həftənin iki günü, şənbə və cümə günlərinin zühur günü kimi qeyd olunmasıdır. Amma bu qrupdan olan rəvayətləri bir şəkildə əsaslandırıb onlar arasında ortaq nöqtəni əldə etmək mümkündür; çünki bu rəvayətlərin mənbələri düzgün olarsa, bu zaman cümə gününü imamın zühur edəcəyi gün olaraq təyin edən hədislər, zühur gününə dəlalət edir və şənbə gününü zühur üçün təyin edən rəvayətlər isə, imamın hakimiyyətinin qurulub təşkil olunacağı və həmçinin, müxaliflərin (düşmənlərin) məhv edildiyi günə işarədir.

Məlum olduğu kimi, imam Zamanın (ə.f) zühuru ilk mərhələdə səmavi bir nida ilə xəbər veriləcək və o həzrət arxası Kəbəyə durduğu halda, haqqa dəvət edərək öz zühurunu elan edəcək.

İmamın zühur edəcəyi yer

İmam Baqirdən (ə) o həzrətin belə buyurduğu rəvayət olunur: “Həzrət Mehdi (ə.f) Məkkədə işa namazı zamanı zühur edəcək, Peyğəmbərin (s) bayrağı, köynəyi və qılıncı ixtyarında olacaq, işa namazını qıldıqdan sonra fəryad edəcək: “Ey camaat! Mən sizə Allahı yad etməyi və Allah qarşısında (qiyamət günü) hazır olacağınızı xatırladıram, O, yer üzündə (dünyada) höccətini tamamlamış, peyğəmbərlər göndərmiş və Quranı nazil etmişdir. Allah sizə ona şərik qoşmamağı, ona və peyğəmbərlərinə itaət etməyi əmr edir. Quranın əmr etdiyini dirçəldib yaşadın və məhv edilməsi əmr ediləni məhv edin, hidayət yolunda köməkçi olun, təqvalı olmaqda bir-birinizlə həmkarlıq edin. Çünki dünya fani və tənəzzülə doğru üz tutaraq vidalaşıb getmək üzrədir. Mən sizi Allaha və onun Peyğəmbərinə (s) doğru dəvət edirəm. Onun kitabına əməl edib batili məhv etmək və Peyğəmbər (s) sünnəsini yaşatmağa dəvət edirəm.” O zaman üç yüz on üç səhabəsi arasında zühur edəcək.

Həzrətin köməkçiləri

Bir çox rəvayətlərə görə, imam Zaman (ə.f) zühur etdikdə, onun xüsusi səhabələrinin sayı Bədr döyüşçülərinin sayı qədər, 313 nəfər olacaqdır. Əban ibn Təğləb deyir: “Məkkədə məscidlərdən birində imam Sadiqin (ə) xidmətində idim, əlim onun əlində idi, həzrət buyurdu: “Ey Əban! Allah bu məscidə 313 kişi gətirər... hər birinin üstündə şəxsin adı, atasının adı, xüsusiyyətləri və nəsli yazılmış qılınclar olar, sonra (imam Mehdi (ə.f)) buyurar ki, bir şəxs belə fəryad etsin: “Bu, Mehdidir, Həzrət Davud və Süleymanın hökmü ilə hökm edir, şahid istəmir. ”

Əlavə mütaliə üçün müraciət edin:

·       “Çeşməndazi be hökuməte Məhdi (ə.c) ”, Nəcmuddin Təbəsi.

·       “Dadqostəre cəhan”, Ayətullah İbrahim Əmini.

·       “Muntəxəbul-əsər”, Ayətullah Safi Gülpayiqani.

---