Quranda örnək qadınlar

Quranda örnək qadınlar

Sual: "Quranda hansı qadınlar başqalarına örnək olaraq qeyd edilmişdir?"

Cavab: Allah Quranda xanım Məryəm (ə) və Fironun həyat yoldaşı Asiyanı misal gətirərək bütün möminlərə örnək göstərmişdir. Xanım Məryəmin (ə) Quranda heç bir qadının sahib olmadığı xüsusi məqamı vardır və Allah onu dövrünün bütün qadınlarından üstün etmişdir. Habelə Quranda Məryəmin (ə) anasının (İmranın həyat yoldaşı idi) Allahla danışması və övladını Allah üçün nəzir etməsi də qeyd olunmuşdur.

Allah bu qadınların müqabilində isə kafirlər üçün Nuh (ə) və Lut (ə) peyğəmbərin həyat yoldaşlarını misal çəkir.

Xanım Məryəm (ə)

Həzrət İsanın (ə) anası və İmranın qızı Məryəm qadınlara örnək olaraq qeyd edilmişdir:

وَمَرْيَمَ ابْنَتَ عِمْرَانَ الَّتِي أَحْصَنَتْ فَرْجَهَا فَنَفَخْنَا فِيهِ مِن رُّوحِنَا وَصَدَّقَتْ بِكَلِمَاتِ رَبِّهَا وَكُتُبِهِ وَكَانَتْ مِنَ الْقَانِتِينَ

“Habelə öz namusunu (iffətini) qoruyan İmran qızı Məryəmi də (məsəl çəkdi). Biz ona Öz ruhumuzdan üfürdük və Rəbbinin kəlmələrini və Onun (səmavi) kitablarını təsdiq etdi və o Allaha itaət edənlərdən idi.” (“Təhrim” surəsi, ayə 12).

Quranda xanım Məryəmdən (ə) başqa, heç bir qadının adı çəkilməmişdir. Quranın ayələrinə əsasən, mələklər onunla danışmış və İsanın (ə) olacağını ona müjdə vermişlər. “Ali-İmran” surəsinin 42-ci ayəsi xanım Məryəmin (ə) seçilmiş şəxslərdən olduğunu xəbər verir:

وَإِذْ قَالَتِ الْمَلاَئِكَةُ يَا مَرْيَمُ إِنَّ اللّهَ اصْطَفَاكِ وَطَهَّرَكِ وَاصْطَفَاكِ عَلَى نِسَاء الْعَالَمِينَ

“Və (yada sal) o zaman(ı) ki, mələklər dedilər: «Ey Məryəm, həqiqətən, Allah səni seçib, paklaşdırıb və aləmdəki bütün qadınlardan üstün edib.” (“Ali-İmran” surəsi, ayə 42).

Başqa ayələrdə xanım Məryəm (ə) öz iffətini qoruyan, Allahın öz ruhundan ona üfürdüyü, Allahın ayələrini və kitabını təsdiq edən və Allaha itaətkar qadın kimi qeyd edilmişdir (“Təhrim” surəsi, ayə 12). Allahın izni ilə həzrət Zəkəriyyə (ə) xanım Məryəmin (ə) himayəçisi olmuşdur. (“Ali-İmran” surəsi, ayə 37).

Allah bir mələyi insan şəklində Məryəmin (ə) yanına göndərir ki, övladının olacağını ona müjdə versin. Daha sonra o, İsaya (ə) hamilə qalır. Uşaq dünyaya gəldikdən sonra, xanım Məryəmə (ə) tapşırılır ki, insanların töhmətinin qarşısında sükut etsin. Xanım Məryəm (ə) camaatın yanına gedir və insanlar tərəfindən töhmətə məruz qalır. Amma anasını ittihamdan qurtarmaq üçün yenicə doğulmuş İsa (ə) möcüzə olaraq beşikdə dil açıb danışır. (“Məryəm” surəsi, yə 16-36)

Asiya

Allah Muzahimin qızı Asiyanın hekayəsini bütün möminlərə misal çəkir:

وَضَرَبَ اللَّهُ مَثَلًا لِّلَّذِينَ آمَنُوا اِمْرَأَةَ فِرْعَوْنَ إِذْ قَالَتْ رَبِّ ابْنِ لِي عِندَكَ بَيْتًا فِي الْجَنَّةِ وَنَجِّنِي مِن فِرْعَوْنَ وَعَمَلِهِ وَنَجِّنِي مِنَ الْقَوْمِ الظَّالِمِينَ

”Və Allah iman gətirən kəslər üçün Fironun zövcəsini məsəl çəkdi. O zaman o demişdi: “Ey Rəbbim, mənim üçün Öz yanında (Öz cəlal və rəhmətinin yaxınlığında) – Cənnətdə – bir ev tik! Mənə Firondan və onun əməlindən nicat ver, məni zalım qövmdən (onun sarayındakılardan və millətindən) qurtar!”” (“Təhrim” surəsi, ayə 11).

Başqa yerdə qeyd olunur ki, o, həzrət Musanı (ə) öldürməməsi və övladlığa götürməsi üçün Fironu razı salmışdır (“Qəsəs” surəsi, ayə 9). Təfsir alimləri Asiyanın ağır işgəncələr altında olduğuna baxmayaraq, imanından dönmədiyini və canını tapşırdığını qeyd etmişlər. (1)

İstifadə olunmuş ədəbiyyat

Təbərsi, “Məcməul-bəyan”, c. 25, səh. 155; Muğniyə, “Kaşif” təfsiri, c. 7, səh. 615; MəhəmmədHüseyn Təbatəbai, “Əl-Mizan” təfsiri, c. 19, səh. 581